ننګرهار کې د کب ۱۰مه د دوحې تړون درېيمه کاليزه ونمانځل شوه
۱۰/۱۲/۱۴۰۱
د ننګرهار ولايت مرکز جلال اباد ښار خان عبدالغفار خان کمپلکس کې استخباراتو رياست له لوري د کب لسمه د دوحې تړون (د اشغال خاتمې او خپلواکۍ بېرته ګټلو درېيمه کاليزه) د يوې غونډې په ترڅ کې ونمانځل شوه، چې پر مهال يې د استخباراتو رئيس مولوي محمدالله ادريس، د ملکي او نظامي ادارو مسئولينو، علماء کرامو، مخورو، ځوانانو، فرهنګيانو او ګڼ شمېر نورو حضور درلود.
يادې غونډې ته د ننګرهار استخباراتو رياست په استازيتوب مولوي محمد اسحاق نظامي وويل، چې درې کاله وړاندې يرغلګرې امريکا د خپلې ماتې پټولو په موخه د اسلامي امارت مشرانو سره د دوحې تړون لاسليک کړ، چې په ترڅ کې يې هېواد ته خپلواکي راغله؛ خو متاسفانه چې امریکا ډيری ژمنې نه دي عملي کړي.
د ياد رياست وياند قاري منصور حبيبزي په خپلو خبرو کې خوښي وښوده، چې د دوحې تړون نړۍ ته د افغانانو د مظلوميت او مېړانې انځور وړاندې کړ او له غونډې څخه يې موخه په ځوانانو کې د فکري ويښتيا او ازادۍ روح تازه کول ياد کړل.
استاد عبدالرحيم صراف او استاد محمد ګلاب توحيدیار وويل، چې د اسلامي امارت د بريا لامل د مجاهد ولس د بچیانو سرښندنې او اسلامي جزبه وه، چې امریکا يې د دوحې تړون ته مجبوره کړه او شرمناکه ماته يې وخوړه.
دوی له مسئولینو، ځوانانو او رسنيو وغوښتل، چې د موجوده نظام ملاتړ وکړي او ټول په يو قوت سره د دې نظام پايښت او بريا په موخه کار وکړي.
د ننګرهار ملي راډيو تلويزيون آمر مولوي امان الله عادل وويل، چې امریکا د افغان ولس حقونه نقض کوي او غوښتنه يې وکړه ترڅو ا.ا په رسميت و پيژندل شي او کنګل شوې پانګه ازاده شي.
په دې غونډه کې شاعرانو د کب لسمې په مناسبت خپل جوړ کړي شعرونه او ترانې هم وويلې همدا راز د ثالث عمر په نوم د اسلامي امارت د مؤسس اميرالؤمنين ملا محمد عمر مجاهد رحمه الله د کړنو کتاب، چې په ۵۴۳ مخونو کې ليکل شوی د غونډې پر ګډونوالو وويشل شو.
په ياده غونډه کې د اطلاعاتو فرهنګ رئیس قاری نور محمد حنيف، د ورزش رئيس عبدالسلام وزيروال، د ځوانانو چارو آمر محمد اصف زهير، د ولايت مقام وياند قاري قاضي ملا عادل او نورو مسئولينو هم حضور درلود.
